Microsoft ၏ ဗျူဟာမြောက်ခြေလှမ်းသစ် (သို့မဟုတ်) Surface Tablet

ကမ္ဘာပေါ်တွင် အကြီးဆုံး Software ကုမ္ပဏီကြီးဖြစ်သည့် Microsoft မှ ပြီးခဲ့သည့်ရက်ပိုင်းအတွင်း အမေရိကန်ပြည်ထောင်စုတွင် ကျင်းပခဲ့သည့် ပြပွဲတစ်ခုတွင် ၎င်းတို့၏ ခြေလှမ်းသစ်တစ်ရပ်ဖြစ်သည့် Surface ဟု အမည်ပေးထားသော Tablet များကို ပွဲထုတ်ပြသခဲ့သည်။ အဆိုပါ Tablet များတွင် Microsoft ၏ OS အသစ်ဖြစ်သည့် Windows 8 ကိုအသုံးပြုထားသော Surface Pro Version နှင့် အခြားသော ARM Processor အသုံးပြု Tablet များအတွက်ပါ ရည်ရွယ် ထုတ်လုပ်ထားသည့် Windows RT ကိုအသုံးပြုထားသည့် Version ဟူ၍ နှစ်မျိုးခွဲခြားထားသည်။ လက်ရှိ Tablet လောကကို Apple ၏ Ipad တစ်မျိုးတည်းကသာ  ကြီးစိုးထားရာ Microsoft ကဲ့သို့ အရှိန်အ၀ါကြီးမားသော ယှဉ်ပြိုင်ဘက် တစ်ဦးဝင်ရောက်လာခြင်းက ပြိုင်ဆိုင်မှု အရှိန်အဟုန် ပိုမိုအားကောင်းလာစေမည်ဖြစ်သည်။

၎င်း မော်ဒယ် နှစ်မျိုးအနက် Windows 8 ကိုအသုံးပြုထားသည့် အမျိုးအစားသည် Intel ၏ တတိယမျိုးဆက် Ivy Bridge Processor ကိုအသုံးပြုထားပြီး အနည်းငယ်ပို၍ထူသည်။ Storage အနေဖြင့် 64GB သို့မဟုတ် 128 SSD ကိုအသုံးပြုထားကာ အချက်အလက်များ အရ Ultrabook ကွန်ပျူတာများနှင့် အနည်းငယ် ဆင်သယောင်ဖြစ်သည်။ ဒုတိယတစ်မျိုးဖြစ်သည့် Windows RT ကိုအသုံးပြုမည့် အမျိုးအစားသည် Nvidia ARM-based Processor ကိုအသုံးပြုထားကာ 32GB နှင့် 64GB Internal Storage Type ဖြင့် ထုတ်လုပ်မည်ဖြစ်သည်။ Windows 8 version ၏မျက်နှာပြင်မှာ Full HD ကိုပြသပေးနိုင်မည်ဟုဆိုကာ Windows RT အမျိုးအစားမှာမူ HD Screen ဖြစ်ကြောင်းနှင့် အသေးစိတ် အချက်အလက်များကိုမူ ထုတ်ပြန်ကြေငြာခြင်း မပြုသေးပေ။ Screen Size မှာမူ နှစ်မျိုးစလုံး 10.6 inch အရွယ်အစားဖြစ်သည်။

ကိုယ်ထည်ကို Magnesium Alloy သတ္တုစပ်ဖြင့် ပြုလုပ်ထားပြီး မျက်နှာပြင်ကို သာမာန်ဆေးမှုတ်ထားခြင်းမျိုး မဟုတ်ဘဲ Vapour Deposition ဟုခေါ်သော နည်းစံနစ်ဖြင့် သိပ္ပံနည်းကျ ဓါတ်ပြုဖုံးအုပ်ထားကာ ပိုမို အကြမ်းခံနိုင်စေပြီး တန်ဖိုးအားဖြင့် မြင့်တက်စေသည်။ “တော်တော်လေးပါးပြီးပေါ့ပါတယ်.. ပြီးတော့ကိုင်ရတာ သက်တောင့်သက်သာရှိတယ်..ကြည့်ရတာကို ထိတွေ့အသုံးပြုချင်စရာပါပဲ.. ပြီးတော့ ကီးဘုတ်ပါ တစ်ခါတည်းပါတဲ့ ကာဗာလေးကို တွဲပြီးသုံးလို့ရတယ်...ဘယ် Tablet မှာမှ မတွေ့ဘူးသေးတဲ့ Idea ပါပဲ “ ဟု ကိုယ်တိုင် စမ်းသပ်ကြည့်ခဲ့သူ တစ်ဦးမှဆိုသည်။

Surface Tablet များကို 3mm အထူသာရှိသော Cover အဖြစ်နှင့်ရော Touch Sensative keyboard အဖြစ်နှင့်ပါ အသုံးပြုနိုင်သည့် ကိုယ်ထည်တွင် သံလိုက်ဖြင့် တွဲဆက်ရသည့် Touch Cover နှင့် တွဲဖက်အသုံးပြုနိုင်သည်။ ထို့ပြင် အနည်းငယ်ပို၍ ထူသည့် ကီးအစစ်များတပ်ဆင်ထားသည့် Type Cover နှင့်လည်း တွဲဖက်အသုံးပြုနိုင်သည်။ ထို့ပြင် ကိုယ်ထည်၏ နောက်ဘက်မျက်နှာပြင်မှ ခွာထုတ်၍ရသော ထောက်လေးဖြင့် ကီးဘုတ်နှင့် အသုံးပြုစဉ် တည်ငြိမ်တည့်မတ်စွာ အသုံးပြုနိုင်စေရန် ထောက်ထားနိုင်သည်။ (၎င်းက လက်ရှိဈေးကွက်အတွင်းရှိ Asus ၏ Transformer စီးရီးတွင် တွေ့ရသော ပြသနာ တစ်မျိုးဖြစ်သည့် ကီးဘုတ် နှင့်တွဲကာ ထောင်ထားလျှင် နောက်ဘက်သို့ လန်ကျသွားသည့် ပြသနာမျိုးကို ပြေလည်ပြီးဖြစ်စေသည်။)

ရှေ့ဘက်မျက်နှာပြင်ပေါ်ရှိ Windows Logo မှာ အပြသက်သက် မဟုတ်ဘဲ ခလုတ်တစ်ခုဖြစ်ကာ နှိပ်လိုက်လျှင် ပင်မ စာမျက်နှာသို့ ရောက်ရှိမည်ဖြစ်သည်။ ထို့ပြင် ဘေးမျက်နှာပြင် အနားသား တစ်ခုလုံးသည်လည်း ထိတွေ့မှုကို အာရုဏ်ခံနိုင်ကာ ပွတ်သပ်လိုက်လျှင်လည်း ပွတ်သပ်သည့် ပုံသဏ္ဍန်ပေါ်မူတည်၍ အစ စာမျက်နှာ Start Screen (သို့မဟုတ်) application bar စသည်ဖြင့် ပွင့်လာမည်ဖြစ်သည်။ Microsoft သည် ၎င်း၏ Surface Tablet တွင် ပါသင့်သည့် Connection Port များ ပါဝင်အောင်တပ်ဆင်ထားသည်ကိုတွေ့ရသည်။ အောက်ဘက်တွင် Magnetic Keyboard Connector, အပေါ်ဘက်တွင် ပါဝါခလုတ်တပ်ဆင်ထားသည်။ ဘေးဘက်တွင်မူ တစ်ဘက်တစ်ချက်၌ Speaker တစ်လုံးစီ Dual Microphone ,Micro SD card slot,  USB 3.0 (RT Version တွင်မူ USB 2.0) Port, Mini Display Port (RT Version တွင်မူ Micro HDMI) နှင့် Magnetic Power Connector တို့ပါရှိသည်။

Microsoft ၏အဆိုအရ လက်ရှိ Tablet အနေဖြင့် iPad များကိုသုံးစွဲနေကြသည့် Windows ကွန်ပျူတာ အသုံးပြုသူ အများစုကို အဆိုပါ Surface Tablet ဖြင့် ပြန်လည်ဆွဲဆောင်နိုင်လိမ့်မည်ဟု ဆိုသည်။ ၎င်း၏ Intel Core i5 Processor သုံး Pro Version တွင် လက်ရှိ Windows Platform ပေါ်မှ ရေပန်းစားနေပြီးဖြစ်သော Software များကို ထည့်သွင်းအသုံးပြုနိုင်မည်ဖြစ်ကြောင်းလည်း ကြေငြာထားသည်။ ယခုနှစ်ကုန်ပိုင်းတွင် စတင်ဖြန့်ချိမည့် ၎င်း Tablet များသည်  အမှန်တကယ် စွမ်းရည်ပြည့် အသုံးပြုနိုင်ပါက ၎င်း၏ Touch Screen အသုံးပြုနိုင်သည့်စွမ်းရည်နှင့် Windows အခြေပြု Software များ၏လုပ်ဆောင်နိုင်စွမ်းရည်တို့ပေါင်းစပ်ကာ ကွန်ပျူတာ အသုံးပြုသူများအကြား နည်းပညာ နယ်ပယ်သစ်တစ်ရပ် ပေါ်ထွန်းလာဖွယ်ရှိကြောင်း တင်ပြလိုက်ရပါသည်။

ကိုငယ် (မန္တလေး)